Hallo zusammen,
saumäßig schee wars, on indressand, bsonners was dr Max on dr Carsten iwer die Eingweide von som Akkordeon wisse dun. On die Inge, die hat vielleichd a große Stub, do kenned virzeh ausgwagsene Leid von Freidag bis Sonndag Akkordeon spiele, alloi oder a zu mehrere, machmal s'gleiche Stickle, machmol jeder a anners, on do kammer schwäze, on esse, on drenge. Do kammer Vivaldi here, oder Oberkrainer, oder d'verliebte Harmonika, odr Goisern-Duett. On sogar verzaubert kamer do were in derre Stub, denn Ihr werdets net glawe, en echde Zauberer war a do, der hat zauberd wie de Deifl, also koi so an Drixer, wie mer se em Fernseh seh dud, noi, an rechde echde Zauberer - on dem had mer echd verdraue kenne, s'had immer gschdimmd, was er verschbroche had, obwohl mir emmer gmoind hen, mer kennd em doch ned draue. Bloß domm, aus meinerer Morino had er koi Goläle zaubere welle - awer vielleichd s'nägschde Mol. On Akkordeons hads uff dem Treffe ghed, mr kanns kaum glawe, soviele sen do rumgschdanne, dass mr en derre Stub kaum no de Bode gsäh had, echd. On so isch aus mindeschdens oim 37-Taschde_Ohenger an 41er worre.
Also bei dr Inge ko i bloß nomal ganz arg danksche sage, sie isch a ganz prima und großziegige Gaschdgeberin, sie had uns grad mache lasse, wie wenn mer bei ihr dehoim gwäse wäred. So Leid wie Inge brauchds hald, dass des Forum ned bloß virtuell, sondern a menschlich wird. On des had ewe ganz wesendlich zu dem rundrum gelungene Dreffe beidrage. Inge, i drigg de halt nomal virtuell. Meine Gedange kreised um Eich alle, die Ihr debei wared, on so heb i richtig Luschd, weiter mid 'm Akkordeon Musik z'mache, denn wie de Max obe schon gschriebe had, nach em Dreffe isch vor em Dreffe.
Viele Grieß
morino47
